Marrëveshja me Danimarkën për të burgosurit, 15 zyrtarë të SHKK-së fillojnë trajnimin në Kopenhagë

20:35 | 23 Qershor 2025
E.H

Shërbimi Korrektues i Kosovë njofton se në kuadër të marrëveshjes për transferimin e të burgosurve danezë në Burgun e Gjilanit, 15 zyrtarë korrektues të kësaj qendre ndodhen aktualisht në Kopenhagë, ku kanë filluar trajnimin e tyre profesional.

Trajnimi, i cili do të zgjasë gjashtë muaj, organizohet nga autoritetet daneze dhe ka për qëllim ngritjen e kapaciteteve të stafit korrektues për menaxhimin dhe trajtimin e të burgosurve në përputhje me standardet më të avancuara evropiane.

“Shërbimi Korrektues i Kosovës vlerëson këtë angazhim si një hap të rëndësishëm drejt forcimit të bashkëpunimit dhe përmirësimit të praktikave profesionale në burgun e Gjilanit. Përvoja që zyrtarët do të fitojnë në këtë trajnim pritet të kontribuojë ndjeshëm në përgatitjen e Burgut të Gjilanit për pritjen dhe trajtimin efikas të të burgosurve nga Danimarka”, thuhet në njoftim./Arbresh.info